A vila fundada por San Rosendo, berce de escritores referentes das letras galegas coma Manuel Curros Enríquez, Celso Emilio Ferreiro ou Xosé Luis Méndez Ferrín, atesoura vestixios e monumentos da talla da capela mozárabe de San Miguel, o mosteiro de San Salvador ou a casa museo da Fundación Curros Enríquez.

Deixando atrás o casco urbán e o burgo medieval de Vilanova dos Infantes no horizonte, o camiño cruza o río Ourille no Ribeiro e o Arnoia en Pontefechas, para seguir cara A Merca e San Cibrao, coas paradas obrigadas no santuario da Armada, o os cruceiros de Rante e Soutopenedo e o monumental casco histórico de San Cibrao.

Un trazado medieval substituíu a calzada romana que ía ata a capital ourensá e que será obxecto de estudo e promoción por parte desta asociación. Por agora, a recomendación é non perder o ronsel da vella estrada de Ourense, aínda que se propón algún desvío para evitar tanto asfalto.

O acceso á cidade de Ourense e o discorrer ata a Ponte Romana, onde o Camiño de San Rosendo e da Raíña Santa conflúe na Vía da Prata, realizarase pola senda fluvial que volve coincidir co Camiño Natural de San Rosendo.

Powered by Wikiloc

Distancia: 27,5 quilómetros
Altitude máx/mín: 526/100 metros
Dificultade técnica: Moderada